Jam 5 | GbrGAW | STEP | Dnawye, ofye anyabwayi, esa nyi nfye ɓa cibwi fyei do mi, nbugbawun yi ntu n wahala ɓo n kwo ɓelo nfye abye nyi.

James 5

Pmagna Ga Anyabwayi

1 Dnawye, ofye anyabwayi, esa nyi nfye ɓa cibwi fyei do mi, nbugbawun yi ntu n wahala ɓo n kwo ɓelo nfye abye nyi. 2 Ofye nyabwa nkubo ofye aje manayi anya ku gyi, ɓaku ze aje sakun. 3 Ofye zinariya n azurfayi ampanyi nla kniya, kwo zhin efye ɓenukwoyi saida. Kwa gyifye abu ngye na, Nyanu n fye ku sozhi fyehin, fya ɓei gwo n wada nyipyei n kwo ɓelo nyi. 4 Fye kna tnubua fya wo atnu-tnuyi bwici, nfye la ɓa gyifi to fyei gba ɓa nyin. Oɓa bwici kusi Dagayi azabegye nya atnubua.

5 Fye ku sun fi n na anyi, dna n anyida, fyei fu fyehin bugba, nsaiye efye abugba awye-wyeyi zhin ɓa pmi shazun nyipyeyi nu. 6 Fye ku aɓo manayi-zhin-yi zun kni, fyei ku aza wu n ɓa to n kalayi lo ɓa gni ɓahin n fye akun.

7 Nsaiye n fye aba omi azaje, nfye zhi fyei pmi Dagayi jezeɓe nyi, fye zhin hakuri, ngye shi fwai-za zhin wa pmi har mikegye wa do wo ofwa ampanyi nyi. 8 E, fye zhin hakuri, fya bwa bugba kala gama Dagayi la ga ɓe.

9 Fye to da gunnu-gunnu tu n na je tukwon, omi azaje, Ho du laifi akpeya lo nu? Gama gye, Owadayi dnagmayi ɓelo, wo la gaɓe, (Fye fa wa wan wyebwo doho-dohoyi n kwo kunce.)

10 Ntu hakuri ɓo dna n wahala, fye shi Dagayi anabi wye kwa ze fye ɓesisi. 11 Yi kpelo shi ɓa dagma lo n saiye, ntu ge ɓa bei la kpema wo nsahi yi, kwo dayake ɓa bei ku wahala sin n mwa. Ayuba zhin misalinu oza n wo ɓei kpema Dagayi dna n wo azhin-gye, dna n wo wahala, yi ku gye shi Dagayi shiri bei zofi n ɓemana, gama wo nu-nuyi n sun-sungye yi. 12 Ama dna aɓo vinya omi azaje, fye to si nyasi n ʼshe yi kwo anyin, bwaci ge e, kwo aʼa nnabai n ho ta zhin laifi a zun ho kni n.

Kagna n bmazhin yi

13 Zaholo n fyemi woi sin wahala? Wo zhin aduwa ntuce, Aza n ɓa n ɓei lo n ɓa ɓa sa Shekwoyi ami ɓa gyi abye ɓai kwo anyi ga Dagayi, bai la Wo tu.

14 Nyasan san Zaho lo? Wo yi a ikklisiya atukwoda ɓa zhin aduwa gawo, ɓa shin wo emi, ɓai yi Dagayi wa kawo gna. 15 Oɓa aduwa nɓa zhin n gaiciya yli ga, ɓa ɓa kawo gna, gama Dagayi ɓa ka wo gna, ndei nyasan n kwo sanwo nyi laifi nu na bewo n kwoi, Dagayi ɓa zhin wo gafara.

16 Fye zhin aje gafara fyei zhin aduwa ga je, n na bai fya bwa lafiya Ɓefyece zhinyi aduwa ɓa zhin ikoyi mwa, kwa ɓe n amsa manayi. 17 Iliya ɓei zhin oza nu n gye yi, ama wa mi wa zhin aduwa nge ogma to zhin, to kwa zhin har eye ngun ata n na pyai kpe ngun tnanyi. 18 N navun wa je aduwa zhin ge ogma kwo zhi, agbe-gbe ɓa je ya pa, anya ya pa njesun n na fwa.

19 Omi azaje, ndei zaho la bma n Shekwoyi zokwo to woi ye kpema Dagayin, oza ho wa bma wo zhin wa gye Gaiciya. 20 Ozahi n wa jezeɓe n woi n Shekwoyi aba nyi, wo la wyewyeyi bwi-bwiyi gni n efi, kwoi ɓe n owo a laifi gafara zhin yi n mwa.